ఆదినారాయణ నాకు నభయ మీవె
కాదని తప్పు లెంచక కరుణానిధీ

తుదకెక్క నింద్రియపు దొంగలకుఁ దాపిచ్చితి
యెదుటికి రాఁగా నీ వే మందువో
మదించి నాలో నుండఁగా మఱచితి నే నిన్ను
యిదె కాను కియ్యఁగా నీ వేమందువో

పక్కన నీ యాజ్ఞ దోసి పాపము లెల్లాఁ జేసితి
యిక్కడ నే మొక్కఁగా నీ వేమందువో
దిక్కు నీ వుండఁగాఁ బరదేవతలఁ గొలిచితి
నెక్కొని రక్షించు మంటే నీ విఁక నేమందువో

తొట్టి కామక్రోధాలతో దూరు లెల్లాఁ గట్టుకొంటి
యిట్టె ముద్ర మోచే నంటే నేమందువో
నెట్టన శ్రీవేంకటేశ నీకు నలమేల్మంగకు
గట్టిగా నే లెంక నైతి కరుణిం చేమందువో