అదె లంక సాధించె నవనిభారము దించె
విదితమై ప్రతాపము వెలయించె నితఁడు

రవివంశతిలకుఁడు రాముఁ డితఁడు
భువిఁ బుట్టె దశరథ పుత్రుఁ డితఁడు
భవుఁడెంచెఁ దారకబ్రహ్మ మీతఁడు
పవనజుకిచ్చినాఁడు బ్రహ్మపట్ట మీతఁడు

బలువుఁడు సీతాపతి యితఁడు
తలకొన్న వాలిమర్దనుఁ డితఁడు
విలసిల్లె నేకాంగవీరుఁ డితఁడు
చలమరి కోదండదీక్షాగురుఁ డితఁడు

శరణాగత వజ్రపంజరుఁ డితఁడు
సరిలేని యసురభంజకుఁ డితఁడు
వరదుఁడు శ్రీవేంకటేశ్వరుఁ డితఁడు
అరయ విజయనగరాధీశుఁ డితఁడు