అహోబలేశ్వరుడు అఖిల వందితుడు
మహి నితని గొలిచి మనుడిక జనులు // పల్లవి //

మూడు మూర్తులకు మూలంబీతడు
వేడి ప్రతాపపు విభుడీతడు
వాడి చక్రాయుధ వరదుండీతడు
పోణిమి పురాణ పురుషు డీతడు // అహోబలేశ్వరుడు //

అసురలకెల్ల కాలాంతకు డీతడు
వసుధ దివ్యసింహం బితడు
విసువని ఏకాంగ వీరుడీతడు
దెసల పరాత్పరతేజం బితడు // అహోబలేశ్వరుడు //

నిగిడి శ్రీవేంకట నిలయుడీతడు
బగివాయని శ్రీపతి యీతడు
సొగసి దాసులకు సులభు డీతడు
తగు ఇహపరముల దాతయు నీతడు // అహోబలేశ్వరుడు //