అలమేలుమంగను నేనైతేనయితిఁగాక
నిలుచుండి నన్నుఁ జూచి నీకేల లోఁగను

చేరి విన్నవించవే సిగ్గువడ నీకేఁటికి
చీరుమూరుగా వలచినదానవు
వేరులే కప్పటనుండి వేళగాచుకుందానవు
నేరుపుతో నన్నుఁ జూచి నీవేల లోఁగేవు

గట్టిగాను నవ్వవే కడుదాఁచనేఁటికి
తొట్టినట్టితమకముతోడిదానవు
నట్టున నందుకుఁగానే కోరి లాచి(జాచి ?) వుందానవు
నెట్టన నేనుండఁగాను నీవేల లోఁగేవు

యెనసి కాఁగిలించవేఁ యేఁకరఁగ నీకేఁటికి
పనివడి యట్టె యాసపడదానవు
మునుపె నన్నుఁ గూడె నిమ్ముల శ్రీవేంకటేశుఁడు
నిను నాతఁడే కూడి నీవేల లోఁగేవు