అవధరించఁగదవయ్య అన్నిరసములు నీవు
తివురుచునబ్బెనిదె తేనెమోవిరసము // పల్లవి //

చెలియచక్కఁదనాన శృంగారరసము
వెలయ బొమజంకెనల వీరరసము
కలయు రతికాంక్షలను కరుణారసము
అలరు మైపులకలను అద్భుతరసము // అవ //

తరుణిసరసములను తగుహాస్యరసము
పరుషంపువిరహాన భయరసము
బెరయు నిబ్బరములను భీభత్సరసము
గరిమ మరుయుద్ధాన ఘనరౌద్రరసము // అవ //

వనితఆనందముల వడిశాంతరసము
ననుపుమంతనములను నవరసంబులు
యెనలేని శ్రీ వేంకటేశ నీతోఁ గూడి
దినదినవినోదాల తిరమాయ రసము // అవ //