ప|| చలపాది రోగమీ సంసారము నేడు | బలువైన మందు విష్ణు భక్తి జీవులకు ||

చ|| కీడౌట మదినెరింగియు మోహ మెడలదిది | పాడైన విధికృతము బలవంతము |
ఈడనే ఇది మాన్ప హితవైన వజ్రాంగి | జోడువో హరి దలంచుట జీవులకును ||

చ|| హేయమని తెలిసి తా నిచ్చగించీ యాత్మ | పాయదీ రతి సుఖము బలవంతము |
మాయ నుగ్గులు చేయ మాధవుని దంచనపు | రాయివో వైరాగ్య రచన జీవులకు ||

చ|| పొలయు దురితంపు రొంపులు దన్నువడి ముంచ | పలుమారు జన్మమీ బలవంతము |
నెలవుకొని సకలంబు నిర్మలముగా కడుగు | జలధివో వేంకటేశ్వరుడు జీవులకు ||