ప|| దైవకృతంబట చేతట తనకర్మాధీనంబట | కావలసినసౌఖ్యంబులు గలుగక మానీనా ||

చ|| ఎక్కడిదుఃఖపరంపర లెక్కడిసంసారంబులు | యెక్కడిజన్మము ప్రాణులకేలా కలిగినది |
యెక్కడిమోహవిడంబన యెక్కడియాశబంధము | యెక్కడికెక్కడ నిజమై యివి దానుండీనా ||

చ|| యీకాంతలు నీద్రవ్యము లీకన్నులవెడయాసలు | యీకోరికె లీతలపులు యిట్టే వుండీనా |
యీకాయం బస్థిరమన కీదుర్దశలకు లోనై | యీకల్మషముల బొరలగ నివి గడతేరీనా ||

చ|| దేవశిఖామణి తిరుమల దేవునికృపగల చిత్తము | పావనమై దురితంబుల బాయక మానీనా |
ఆవిభుకరుణారసమున నతడే తను మన్నించిన | ఆవేడుక లీవేడుక లాసలు సేసీనా ||