ప|| దేవుడుగలవారికి దిగులు జింతయు లేదు | శ్రీవిభుడే అన్నిటా రక్షించుగనక ||

చ|| యేలికగలబంటుకు యేవిచారములేదు | వోలి మగడుగలాలికి వొప్పమి లేదు |
పోళిమి దండ్రిగలపుత్రుని కంగద లేదు | మేలుగా బండినభూమికి గరవులేదు ||

చ|| బలముగలరాజుకు భయమేమియు లేదు | కలిమిగలవాని కక్కర లేదు |
యిల నాచారవంతుని కేపాపమును లేదు | తలపుబుణ్యముగల ఆతనికి జేటు లేదు ||

చ|| గురువుగలవానికి గొఱత యేమియు లేదు | పరముగలవానికి భ్రాంతులు లేవు |
యిరవై శ్రీవేంకటేశు డిన్నిటా మాకు గలడు | అరయ దాసులము మా కడ్డాకే లేదు ||