ప|| ధృవవరదా సంస్తుతవరదా | నవమైనయార్తుని నను గావవే ||

చ|| కరిరాజవరదా కాకాసురవరదా | శరణాగతవిభీషణవరదా|
సిరుల వేదాలు నిన్ను జెప్పగా వినీని | మరిగి మఱుగుచొచ్చే మమ్ము గావవే ||

చ|| అకౄరవరదా అంబరీషవరదా | శక్రాదిదివిజనిచయవరదా |
విక్రమించి యిన్నిటా నీవే ఘనమని నీకు | చక్రధర శరణంటి సరి గావవే ||

చ|| ద్రౌపదీవరదా తగ నర్జునునివరదా | శ్రీపతీ ప్రహ్లాదిశిశువరదా |
యేపున శ్రీవేంకటాద్రి నిటు నేను నాగురుడు | చూపగా గొలిచే నచ్చుగ గావవే ||