ఏల రాడమ్మా యింతిరో వా
డేలరాడమ్మా నన్నేలినవాడు ||

పచ్చని పులుగుల బండిమీద నుండు
పచ్చవింటి పిన్నబాలుని తండ్రి
పచ్చని చాయల బాయని బంగారు
పచ్చడముగట్టిన బాగైనవాడు ||

తెల్లని పులుగుపై తిరుగ మరిగినట్టి
తెల్లని సతిపాలి దేవరతండ్రి
తెల్లని పరపుపై తేలి పొరలువెట్టు
తెల్లని కన్నుల దెలివైనవాడు ||

కొండవింటివాని గుత్తగొనినయట్టి
కొండుకప్రాయపు గూతురుతండ్రి
కొండలరాయడు కోనేటి తిమ్మయ్య
కొండ తల నెత్తి గురుతైన వాడు ||