ఏల సిగ్గులు వడేవు యెదుటికి రాగదవే
సోలిగా నీసింగారాలు చూచుగాని యీతడు ||

కొప్పువెట్టుకొంటివిగా కుప్పెసవరము తోడ
కప్పితివిగా పయ్యద కడు బోలుగా
చిప్పిలబూసితివిగా చెంపలునిండా జవ్వాది
యిప్పుడె గక్కన బతినిక వలపించవే ||

కట్టుకొంటివిగా చీరకళబెళ మనగాను
వొట్టుకొంటివిగా సొమ్ములొళ్ళొ నిండాను
గట్టిగా నిడుకొంటివిగా కన్నులనుగాటుక
దట్టముగా నీతనికి తమిరేచగదవే ||

సేసితివిగా విడేలు చెంగావి మోవెల్లాగప్ప
వేసితివిగా మెడను విరిదండలు
వేసర కలమేల్మంగ విభుడు శ్రీవేంకటేశు
డసతో నన్నేల నీవూ నంటనే యీతని ||