ప|| ఏమివలసిన నిచ్చు నెప్పుడైనను | యేమరిక కొలిచిన నీతడే దైవము ||

చ|| ఘనముగా నిందరికి గన్నులిచ్చు గాళ్ళిచ్చు | పనిసేయ జేతులిచ్చు బలియుడై |
తనుగొలువుమని చిత్తములిచ్చు గరుణించి | వొనర లోకానకెల్ల నొక్కడే దైవము ||

చ|| మచ్చిక తనుగొలువ మనసిచ్చు మాటలిచ్చు | కుచ్చితములేని కొడుకుల నిచ్చును |
చొచ్చినచోటే చొచ్చి శుభమిచ్చు సుఖమిచ్చు | నిచ్చలు లోకానకెల్ల నిజమైనదైవము ||

చ|| పంతమాడి కొలిచిన బ్రాణమిచ్చు ప్రాయమిచ్చు | యెంతటిపదవులైన నిట్టె యిచ్చు |
వింతవింతవిభవాల వేంకటేశుడిదె మా- | యంతరంగమున నుండే అరచేతిదైవము ||