ఎంతటివారలు నెవ్వరును హరి
జింతించక నిశ్చింతలు గారు ||

అతిజితేంద్రియులు ననశనవ్రతులు
నతులతపోధనులగువారు
చతురాననగురుస్మరణము దొరకక
తతి నూరక పుణ్యతములు గారు ||

అనఘులు శాంతులు సధ్యాత్మతతులు
ననుపమపుణ్యులు యాజకులు
వనజోదరు ననవరతము దలచక
వినుతిస్మృతిని విబుధులు గారు ||

దురితవిదూరులు దుర్మతిహీనులు
నిరతానందులు నిత్యులును
తిరువేంకటగిరిదేవుని గొలువక
పరమార్గమునకు బ్రహ్మలు గారు ||