హరి నీవే బుద్ధిచెప్పి యాదరించు నామనసు
హరి నీవే నాయంతర్యామివిగాన ||

వసముగానికరివంటిది నామనసు
యెసగి సారెకు మదియించీగాన
పొసగ బాదరసము బోలిననామనసు
అసము దించక సదా అల్లాడీగాన ||

వడి నడవుల చింకవంటిది నామనసు
బడిబడి బట్టబట్ట బారీగాన
కడగి విసరుపెనుగాలివంటిది మనసు
విడువక కన్నచోట విహరించీగాన ||

వరుస నిండుజలనిధివంటిది నామనసు
వొరసి సర్వము లోనై వుండీగాన
గరిమ శ్రీవేంకటేశ కావవే నామనసు
సరి నీయానతి నీకే శరణనిగాక ||