ప|| కాలవిశేషమో లోకముగతియో సన్మార్గంబుల- | కీలు వదలె సౌజన్యము కిందయిపోయినది ||

చ|| ఇందెక్కడిసంసారం బేదెస జూచిన ధర్మము | కందయినది, విజ్ఞానము కడకు దొలంగినది, |
గొందులు దరిబడె, శాంతము కొంచెంబాయ, వివేకము | ముందుకు వెదకిన గానము మంచితనంపుబనులు ||

చ|| మరి యిక నేటివిచారము, మాలిన్యంబైపోయిన- | వెరుకలు, సంతోషమునకు నెడమే లేదాయ |
కొరమాలెను నిజమంతయు, కొండలకేగెను సత్యము | మరగైపోయను వినుకలు, మతిమాలెను తెలివి ||

చ|| తమకిక నెక్కడిబ్రదుకులు, తనబడె నాచారంబులు, | సమమైపోయిన వప్పుడె జాతివిడంబములు, |
తిమిరంబింతయు బాపగ దిరువేంకటగిరిలక్ష్మీ- | రమణుడు గతిదప్పను కలరచనేమియు లేదు ||