ప|| కనియు గాననిమనసు కడమగాక | యెనలేని హరిమహిమకిది గురుతుగాదా ||

చ|| కనుకలిగి హరిగొలిచి ఘనులైరిగాక మును | మనజులే కారా మహరుషులును |
మనసులో నిపుడైన మరిగి కొలిచినవారు | ఘనులౌట కిదియు నిక్కపు గురుతుగాదా ||

చ|| భావించి హరిగొలిచి పదవులందిరిగాక | జీవులే కారా దేవతలును |
కావించి కొలిచినను ఘనపదవు లేమరుదు | యేవలన నిందరికి నిది గురుతుగాదా ||

చ|| పన్ని హరిగొలిచి నేర్పరులైరిగాక ధర- | నున్నవారే కారా యోగివరులు |
యెన్నికల శ్రీవేంకటేశు నమ్మినవార- | లిన్నియును జేకొనుటకిది గురుతుగాదా ||