ప|| కనకగిరిరాయ యేగతి నొడబరచేవో | వినవయ్య సతినీకు విన్నవించుమనెను ||

చ|| చెలియకు నీ విచ్చిన చెంగలువ పూదండ | కలికి యెవ్వతె నీకు గానుకిచ్చెనో |
పలుచగా నిందు మీద బసపంటి వున్నదిలె | నెలత యీగురుతులు నీకు జూపుమనెను ||

చ|| కాంతకు నీవు మెడ గప్పినట్టి కంటసరి | చెంతల నీకెవ్వతె వుచిత మిచ్చెనో |
పంతాన నొక దిక్కున బసిడిపూస వున్నది | అంతయు దెలియ నిన్ను నడిగె రమ్మనెను ||

చ|| భామగూడు నీవిచ్చినపైడి వ్రాతచీర యిది | కామించి యెవ్వతె నీకు గట్నమిచ్చెనో |
ఆమీద శ్రీవేంకటేశ అదె విలాసమున్నది | యేమతకమో యిది యెరిగించుమనెను ||