మేలుకో శృంగారరాయ మేటి మదనగోపాల
మేలుకోవె నాపాల ముంచిన నిధానమా ||

సందడిచే గోపికల జవ్వనవనములోన
కందువందిరిగే మదగజమవు
యిందుముఖి సత్యభామ హృదయ పద్మములోని
గంధము మరిగినట్టి గండు తుమ్మెద ||

గతిగూడి రుక్మిణికౌగిట పంజరములో
రతిముద్దు గురిసేటి రాచిలుకా
సతుల పదారువేల జంట కన్నుల గలువల-
కితమై పొడిమిన నా యిందు బింబమ ||

వరుసం గొలనిలోని వారి చన్నుంగొండలపై
నిరతి వాలిన నా నీలమేఘమా
శిరనురమున మోచి శ్రీ వేంకటాద్రి మీద
గరిమ వరాలిచ్చే కల్పతరువా ||