ప|| మిక్కిలి మేలుది అలమేలుమంగ | అక్కరతో నిన్నుజూచీ నలమేలుమంగ ||

చ|| కొచ్చి కొచ్చి యాలాపించి కూరిమితో బాడగాను | మెచ్చీ నిన్నునిదె యలమేలుమంగ |
నెచ్చెలులతోడ నెల్లా నీగుణాలు సారె సారె | అచ్చలాన నాడుకొనీ నలమేలుమంగ ||

చ|| వాడల వాడల నీవు వయ్యాళి దోలగాను | మేడలెక్కి చూచీ నలమేలుమంగ |
వీడెము చేతబట్టుక వెస నీవు పిలువగా | ఆడనుండి వచ్చె నీకడ కలమేలుమంగ ||

చ|| ఈలీల శ్రీవేంకటేశ ఇంత చనవియ్యగాను | మేలములాడీ నలమేలుమంగ |
యేలిన నీ రతులను ఇదె తన నేరుపెల్లా | ఆలోచనలు సేసీ నలమేలుమంగా ||