ప|| మరచితిమంటే మరిలేదు | తరితో దలచవో దైవము మనసా ||

చ|| పుట్టుచునున్నది పోవుచునున్నది | పట్టపు జీవుల ప్రపంచకము |
నట్టనడుమనే హరినామము | గుట్టున దలచవో కొనగొని మనసా ||

చ|| పొద్దు వొడుచు నదె పొద్దు గుంకు నదె | తిద్దిన జగముల దిన దినము |
అద్దపు నీడల అంతర్యామిని | వొద్దనె తలచవొ ఒనరగ మనసా ||

చ|| లోపల వెలుపల లోగొని ఉన్నది | శ్రీపతి మహిమల సృష్టి యిదే |
యేపున శ్రీ వేంకటేశ్వరు డితడే | దాపని నమ్ముచు దలచవొ మనసా ||