ప|| నేరిచిబ్రదికేవారు నీదాసులు | నేరమి బాసినవారు నీదాసులు ||

చ|| కామము గ్రోధము రెంటీ గాదని విడిచి మంచి- | నేమము పట్టినవారే నీదాసులు |
దోమటి బాపపుణ్యాల దుంచివేసి చూడగానే | నీమాయ గెలిచినవారు నీదాసులు ||

చ|| కిక్కిరించినయాసల గిందవేసి మోక్షము | నిక్కినిక్కి చూచేవారు నీదాసులు |
వెక్కసపుభక్తితోడ వెఱపు మఱపు లేక | నెక్కొన్నమహిమవారు నీదాసులు ||

చ|| అట్టె వేదశాస్త్రముల అర్థము దేటపఱచి | నెట్టుకొని మించినవారు నీదాసులు |
యిట్టె శ్రీవేంకటేశ యితరమార్గములెల్లా | నెట్టువడ దోసినవారు నీదాసులు ||