ప|| నిజమో కల్లో నిముషములోననె | భజించువారల భాగ్యము కొలది ||

చ|| వొకడు కనుదెరచి వున్నది జగమను | వొకడు కన్నుమూసొగి లేదనుచు |
సకలము నిట్లనె సర్వేశ్వరుడును | వెకలి నరులు భావించినకొలది ||

చ|| కడుపు నిండొకడు లోకము దనిసె ననును | కడుపు వెలితైన గడమను నొక్కడు |
తడవిన నిట్లనే దైవమిందరికి | వెడగు నరులు భావించినకొలది ||

చ|| ముదిసి యొకడనును మోక్షము చేర్వని | తుద బుట్టొకడది దూరమనును |
యెదుటనే శ్రీవేంకటేశ్వరు డిట్లనే | వెదకి నరులు భావించినకొలది ||