ప|| నరులాల మునులాల నానాదేవతలాల | పరబ్రహ్మమీతడే ప్రత్యక్షమై వున్నాడు ||

చ|| భావించి చూడరో వీడె ప్రహ్లాద వరదుడు | సేవించరో తొడమీది శ్రీసతిని |
వావిరి నుతించరో వర శంఖచక్రాలనె | కోవిదుడు గద్దెమీద కొలువై వున్నాడు ||

చ|| చెలగి మొక్కరో వీడె శ్రీనరసింహుడు | తెలియరో ఈతని తేజోరూపము |
అలరి పూజించరో అనంత హస్తములవె | కొలదిమీర విష్ణుడు కొలువై వున్నాడు ||

చ|| ఇదె శరణనరో హిరణ్యదైత్యహరుని | అదన జపించరో ఈ హరినామము |
ఎదుట శ్రీవేంకటాద్రిని అహోబలమునందు | కొదలేక ఆదిమూరితి కొలువై వున్నాడు ||