పిడికిట తలంబ్రాల పెండ్లి కూతురు కొంత |
పెడమరలి నవ్వీనె పెండ్లి కూతురు ||

పేరుకల జవరాలె పెండ్లి కూతురు పెద్ద |
పేరుల ముత్యాల మెడ పెండ్లి కూతురు |
పేరంటాండ్ల నడిమి పెండ్లి కూతురు విభు |
పేరుకుచ్చ సిగ్గువడీ బెండ్లి కూతురు ||

బిరుదు పెండము వెట్టె బెండ్లి కూతురు నెర |
బిరుదు మగని కంటె బెండ్లి కూతురు |
పిరిదూరి నప్పుడే పెండ్లి కూతురూ పతి |
బెరరేచీ నిదివో పెండ్లి కూతురు ||

పెట్టెనే పెద్ద తురుము పెండ్లి కూతురు నేడె |
పెట్టెడు చీరలు గట్టి పెండ్లి కూతురు |
గట్టిగ వేంకటపతి కౌగిటను |
పెట్టిన నిధానమయిన పెండ్లి కూతురు ||