ప|| పొత్తుల మగడవు పొరుగున నుండగ | తత్తరమింతేసి తమకేలనయ్యా ||

చ|| యేపున నీమోము యిటు నేజూచిన | చూపు లాపెమై చురకనెను |
ఆపొద్దు నీతో నాడిన మాటల | తీపులు దనకటు తిన జేదాయ ||

చ|| నడుమ నే నీతో నవ్విన వెన్నెల | కడనాపెకు జీకటులాయ |
చిడుముడు నే నిను జెనకిన సరసము | వెడ వెడ దనకవి విరసములాయ ||

చ|| వెస నా మోవులవిందు నీకిడిన | వసిగొని నాపెకు బగలాయ |
యెసగిన శ్రీ వేంకటేశు మమ్మిద్దరి | గొసరికూడితివి గురి దనకాయ ||