ప|| ప్రపన్నులకు నిది పరమాచారము | విపరీతాచారము విడువగవలయు ||

చ|| భగవదపచారము భాగవతాపచారము | దగులక దేవతాంతరము మాని |
నగధరు శరణము నమ్మి యాచార్యుని | బగివాయనిదే పరమవైష్ణవము ||

చ|| దురహంకారము దుఃఖము సుఖమును | బొరయక ప్రాకృతుల పొంత బోవక |
దరిశనాభిమానాన ధర్మము వదలక | పరిశుద్ధి నుండుటే పరమవైష్ణవము ||

చ|| ఉపాయాంతరము లొల్లక భక్తిచేపట్టి | యెపుడూ దీర్థప్రసాదేచ్ఛతోడ |
నిపుణత శ్రీవేంకటనిలయుడే గతియని | ప్రపత్తి గలుగుటే పరమవైష్ణవము ||