ప|| పసిడి చీరవాడావు పాలు దచ్చితివి గాన | పసిడి బోలినది చేపట్టెను నీ కరము ||

చ|| తొలుతనే చందురుని తోడబుట్టు గనుక | పొలుపు జందురు మోము పోలికైనది |
కళల చింతామణి కందువ చెల్లెలు గాన | తళుకుమానికపు దంతముల బోలినది ||

చ|| మంచి యైరావతముతో మగువ సైదోడు గాన | ముంచిన కరిగమనము బోలినది |
పంచల బారిజాతపు భావపు సోదరి గాన | యెంచగ చిగురుబోలె నీకె పాదములు ||

చ|| తామెర తొట్టెలలోన తగిలి తానుండు గాన | తామెర కన్నులబోలి తనరినది |
యీమేర నిన్నిటాబోలి యిన్ని లక్షణములతో | నీమేన శ్రీవేంకటేశ నెలవై నిల్చినది ||