పసులు గాచేటి కోల పసువుజేల
పొసగ నీ కింత యేల బుద్దుల గోల ||

కట్టిన చిక్కపు బుత్తి కచ్చ కాయల తిత్తి
చుట్టిన పించపు బాగ చుంగుల సోగ
ఇట్టి సింగారము సేయ నింత నీకు బ్రియమాయ
వెట్టి నీ చేతల మాయ విట్టల రాయ ||

పేయల బిలుచు కూత పిల్ల గోవి బలుమోత
సేయ రాని గొల్లెతల సిగ్గుల చేత
ఆయెడల దలపోత యమున లోపలి యీత
వేయరాని మోపులాయ విట్టలరాయ ||

కొంకులేని పొలయాట కూరిములలో తేట
అంకెల బాలులతోడి యాట పాట
పొంకపు తత్తురు కొమ్ము పొలువైన నీసొమ్ము
వేంకట నగము చాయ విట్టలరాయ ||