ప|| సందడి విడువుము సాసముఖా | మందరధరునకు మజ్జనవేళా ||

చ|| అమరాధిపులిడు డాలవట్టములు | కమలజ పట్టుము కాళాంజి |
జమలి చామరలు చంద్రుడ సూర్యుడ | అమర నిడుడు పరమాత్మునకు ||

చ|| అణిమాది సిరులనలరెడు శేషుడ | మణిపాదుకలిడు మతి చెలగా |
ప్రణుతింపు కదిసి భారతీరమణ | గుణాధిపు మరుగురు బలుమరును ||

చ|| వేదఘోషణము విడువక సేయుడు | ఆదిమునులు నిత్యాధికులు |
శ్రీదేవుండగు శ్రీవేంకటపతి | ఆదరమున సిరు లందీ వాడె ||