ప|| సంతలే చొచ్చితిగాని సరకు గాననైతి | యింతట శ్రీహరి నీవే యిట దయజూడవే ||

చ|| కాంతచనుగొండలు కడకునెక్కితిగాని | యెంతైనా మోక్షపుమెట్లు యెక్కలేనైతి |
అంతట జవ్వనమనే అడవి చొచ్చితిగాని | సంతత హరిభక్తనే సంజీవి గాననైతి ||

చ|| తెగి సంసారజలధి దిరుగలాడితిగాని | అగడైవైరాగ్యరత్నమది దేనైతి |
పొగరుజన్మాలరణభూములు చొచ్చితిగాని | పగటుగామాదులపగ సాధించనైతి ||

చ|| తనువనియెడికల్పతరువు యెక్కితిగాని | కొనవిజ్ఞానఫలము గోయనైతి |
ఘనుడశ్రీవేంకటేశ కమ్మర నీకృపచేత | దనిసి యేవిధులను దట్టుపడనైతి ||