ప|| సులభమా మనుజులకు హరిభక్తి | వలనొంది మరికదా వైష్ణవుడౌట ||

చ|| కొదలేని తపములు కోటాన గోటులు | నదన నాచరించి యటమీద |
పదిలమైన కర్మల బంధములన్నియు | వదిలించుకొని కదా వైష్ణవుడౌట ||

చ|| తనివోని యాగతంత్రములు లక్షలసంఖ్య | అనఘుడై చేసిన యటమీదట |
జననములన్నిట జనియించి పరమ పా- | వనుడై మరికద వైష్ణవుడౌట ||

చ|| తిరిగి తిరిగి పెక్కుతీర్థములన్నియు | నరలేక సెవించినమీదట |
తిరువేంకటాచలాధిపుడైన కరిరాజ- | వరదుని కృపగద వైష్ణవుడౌట ||