తెలిసితేమోక్షము తెలియకున్న బంధము
కలవంటిది బతుకు ఘనునికిని

అనయము సుఖమేడది అవల దు:ఖమేడది
తనువుపై ఆశలేనితత్వమతికి
పొనిగితే పాపమేది పుణ్యమేది కర్మమందు
వొనర ఫలమునొల్లన యోగికిని

తగిన అమృతమేది తలపగ విషమేది
తెగి నిరాహారియైనధీరునికిని
పగవారనగ వేరె బంధులనగ వేరె
వెగటుప్రపంచమెల్ల విడిచే వివేకికి

వేవేలువిధులందు వెఱపేది మఱపేది
దైవము నమ్మినయట్టిధన్యునికిని
శ్రీవేంకటేశ్వరుడు చిత్తములో నున్నవాడు
యీవలేది యావలేది యితనిదాసునికి