ప|| తనకర్మవశం బించుక, దైవకృతం బొకయించుక, | మనసువికారం బించుక, మానదు ప్రాణులకు ||

చ|| ఈదైన్యము లీహైన్యము లీచిత్తవికారంబులు | యీదురవస్థలు గతులును యీలంపటములును |
యీదాహము లీదేహము లీయనుబంధంబులు మరి | యీదేహముగలకాలము యెడయవు ప్రాణులకు ||

చ|| యీచూపులు యీతీపులు నీనగవులు నీతగవులు- | నీచొక్కులు నీసొక్కులు నీవెడయలుకలును |
యీచెలుములు నీబలువులు నీచనువులు నీఘనతలు- | నీచిత్తముగలకాలము యెడయవు ప్రాణులకు ||

చ|| యీవెరవులు నీయెరుకవులు యీతలపులు నీతెలుపులు | దైవశిఖామణితిరుమల దేవునిమన్ననలు |
దైవికమున కిటువగవక తనతల పగ్గలమైనను | దైవము తానౌ తానే దైవంబవుగాన ||