ప|| తొక్కనిచోట్లు దొక్కెడిమనసు | యెక్కడ గతిలే దింకనో తెరువు ||

చ|| పాపము వాయదు పైపై మనసున | కోపము దీరదు కొంతైనా |
దీపనబాధయు దీరదు కొంతైనా | యేపున బెనగొనె నింకనో తెరువు ||

చ|| యెవ్వనమదమును నెడయదు కోరికె | కొవ్వును నణగదు కొంతైనా |
రవ్వగుమమకారము బెడబాయదు | యెవ్విధియును లేదింకనో తెరువు ||

చ|| వెఱపును విడువదు వెడమాయలబడి | కొఱతయు దీరదు కొంతైనా |
తెఱగొసగేటి శ్రీతిరువేంకటపతి- | నెఱిగీనెఱగలే మికనో తెరువు ||