ప|| తప్పదు తప్పదు దైవముకృప యిది | ముప్పిరి నింతా ముకుందుడే ||

చ|| వెక్కసపుమతి వెలుతులుదీరిన- | నెక్కడ చూచిన నీశ్వరుడే |
గుక్కక యాసలు గోసివేసినను | నిక్కమడుగడుగు నిధానమే ||

చ|| పొంచి శరీరపుభోగము లుడిగిన | చుంచుబాపములు సుకృతములే |
దంచెడి విషయపు తగులము బాసిన | యెంచిచూచినను యిహమే పరము ||

చ|| శ్రీవేంకటపతి సేవే కలిగిన | వేవేలువగలు వేడుకలే |
చేవదీరె సందియము లేదిదే | భావమునమ్మిన ప్రపన్నులకు ||