పల్లవి:

ప|| వెఱతు వెఱతు నిండువేడుకపడ నిట్టి- | కుఱచబుద్ధుల నెట్టు గూడుదునయ్య ||

చరణం:

చ|| దేహమిచ్చినవాని దివిరి చంపెడువాడు | ద్రోహిగాక నేడు దొరయట |
ఆహికముగ నిట్టి అధమవ్రిత్తికి నే- | సాహసమున నెట్టు చాలుదునయ్య ||

చరణం:

చ|| తోడబుట్టినవాని తొడరి చంపెడువాడు | చూడ దుష్టుడుగాక సుకృతియట |
పాడైనయిటువంటి పాపబుద్ధులు సేసి | నీడనిలువ నెట్టు నేరుతునయ్య ||

చరణం:

చ|| కొడుకు నున్నతమతి గోరి చంపెడువాడు | కడుబాతకుడుగాక ఘనుడట |
కడలేనియిటువంటి కలుషవ్రిత్తికి నాత్మ | వొడబరపగ నెట్లోపుదునయ్య ||

చరణం:

చ|| తల్లి జంపెడువాడు తలప దుష్టుడుగాక | యెల్లవారలకెల్ల నెక్కుడట |
కల్లరియనుచు లోకము రోయుపని యిది | చెల్లబో నేనేమి సేయుదునయ్య ||

చరణం:

చ|| యింటివేలుపు వేంకటేశ్వరు దనవెంట- | వెంట దిప్పెడువాడు విభుడట |
దంటనై యాతనిదాసానుదాసుడై | వొంటినుండెద నేమి నొల్లనోయయ్య ||