ప|| విరహాన బడలెను విభుడు యిందాకాను | పురుషార్థమిందు వంక బొందేదేమే ||

చ|| కంతునిదీపమవై ఘమ్మని భ్రమయించేవు | పొంత నిండు వంక నేమిపుణ్యమే నీకు |
పంతమున వలపించి పలుమారు నలిగేవు | యెంత లాభము గలిగె నిందు వంక నీకు ||

చ|| చెరకు సింగణివై చెలువుని నేచేవు | గురిగా నెంత ధనము గూడెనే నీకు |
వెరగువడుచు నీవు వెంటవెంట దిప్పేవు | నెర దొరతనమెంత నేర్చితివె నీవు ||

చ|| పూవుల గాలమవై పురుషుని దగిలేవు | వేవే యెంత రాజ్యమేలితిదె నీవు |
యీవల శ్రీ వేంకటేశుడితడిట్టె నిన్నుగూడె | కైవశమై యెంత కొడిగట్టితివె నీవు ||