ప|| వలచుటే దోసమా వనిత నీకాతడు | నలువంక మరియేటి నవ్వులు నవ్వవే ||

చ|| పంతమెల్ల నీమాటపట్టు లోననే వున్నది | చింతలెల్ల నీచెక్కు చేతనున్నవి |
వింతలన్నియును నీ నివ్వెరుగులతో నున్నవి | యెంతకెంత పతినింకా యేటికి దూరేవే ||

చ|| బిగువెల్ల నిపుడు నీపెదవులపై నున్నది | తెగువలు నీకన్నుల తేటనున్నవి |
ఆగడింతా నీ పొలయలుకలలో నున్నది | యెగసక్కేలాతని నేటికి నాడేవే ||

చ|| గబ్బితనమెల్లాను నీ కౌగిటిలోనే వున్నది | నిబ్బరము నీవుండేటి నీటులో నున్నది |
అబ్బరమై శ్రీ వేంకటాధీశుడు నిన్నుగూడె | వుబ్బున నీతనికెంత వొరటలు చూపవే ||