ప|| వననిధి గురిసినవాన లివి మతి- | పనిలేని పనులభారములు ||

చ|| అడవులవెన్నెల లారిడిబదుకులు | తడతాకులపరితాపములు |
వొడలొసగినహరి నొల్లక యితరుల | బడిబడి దిరిగిన బంధములు ||

చ|| కొండలనునుపులు కొనకొనమమతులు | అండలకేగిన నదవదలు |
పండినపంటలు పరమాత్ము విడిచి | బండయితిరిగిన బడలికలు ||

చ|| బచ్చనరూపులు పచ్చలకొలపులు | నిచ్చలనిచ్చల నెయ్యములు |
రచ్చల వేంకటరమణుని గొలువక | చచ్చియు జావని జన్మములు ||