ప|| వట్టియాసలకు లోనై వదలక తిరిగాడేవు | బట్టబయలు యీసంసారంబని గుట్టుదెలియలేవు ప్రాణీ ||

చ|| చాలనమ్మి యీసంసారమునకు సోలిసోలి తిరిగేవు | బాలయవ్వన ప్రౌఢలభ్రమ బడి లోలుడవై తిరిగేవు |
మేలుదెలియ కతికాముకుండవై మీదెరుగక తిరిగేవు | మాలెమీద పరువెందాకా నీమచ్చిక విడువగలేవు ||

చ|| మానితముగ దురన్నపానముల మత్తుడవై వుండేవు | నానావిధముల దుష్కర్మంబులు నానాటికి నాటించేవు |
మేనిలోని యేగురు నార్గురును మిత్రులనుచు నమ్మేవు | ఆనందంబున నాకర్మమునకు అధిపతులని తెలియగలేవు ||

చ|| పామరివై దుర్వ్యాపారమునకు పలుమారును బొయ్యేవు | వేమరు దుర్జనసంగాతంబులు విశ్రామమనుచు నుండేవు |
ప్రేమతో హరిదాసులపై సంప్రీతి నిలుపగాలేవు | తామసమతివయి వేంకటనాథునితత్త్వ మెరుగగాలేవు ||